Lucía Martínez Cuarteto presenta “Soños e Delirios” no Forum Metropolitano

XORNAL I A Coruña.- A Concellería de Cultura, que dirixe María Xosé Bravo, organiza dentro do ciclo Iberojazz 2008, o concerto de Lucía Martínez Cuarteto no Forum Metropolitano o próximo xoves, 10 de xaneiro.
O grupo presentará o seu primeiro disco “Soños e Delirios” a partir das 21.00h. A entrada custa sete euros en prezo normal e cinco con carnet E maiores de 65 anos.

Lucía Martínez naceu en Vigo en 1982 e completou os seus estudos superiores de percusión clásica no Conservatorio Superior de Música de Vigo e o Octavo grado de percusión pola Guidhall School of London. No ámbito do jazz acadou o curso superior de batería jazz na Escola Superior de Música e Artes do Espectáculo en Porto co profesor Michael Lauren. Como vibrafonista estudou con Jeffri Davis, Dave Samuels, David Friedman, Severio Tasca, Arttu Tacalo e Svery Pysalo.

No Festival San Luiz de Lisboa 2007 recibiu o premio como mellor intérprete e mellor grupo. Pertenceu á Escola de Altos Estudios Musicais de Galicia e estudou no Institute Politecnic of Helsinki Stadia composición, vibráfono, batería, música india e músicas do Mediterráneo. Actualmente comeza un posgrado na Universidae de Artes de Berlín co profesor John Hollenbeck.

É líder do Lucía Martínez Cuarteto, onde ademais de tocar a batería, percusións e electrónica, realiza o labor de composición e arranxos. O grupo complétase con Pedro Neves ao piano, Joao Pedro Brandaos ao saxo e frautas e Carl Minnemann ao contrabaixo.